{"id":7766,"date":"2020-08-31T10:38:30","date_gmt":"2020-08-31T10:38:30","guid":{"rendered":"https:\/\/isf.fo\/?p=7766"},"modified":"2020-08-31T10:43:41","modified_gmt":"2020-08-31T10:43:41","slug":"ferdafrasogn-fra","status":"publish","type":"post","link":"https:\/\/isf.fo\/en\/ferdafrasogn-fra\/","title":{"rendered":"Fer\u00f0afr\u00e1s\u00f8gn fr\u00e1"},"content":{"rendered":"

\u00cd samband vi\u00f0 \u00e1taki\u00f0 \u201cR\u00f8rsla F\u00f8royar\u201d, sum \u00cdSF og F\u00f3lkaheilsur\u00e1\u00f0i\u00f0 hava skipa\u00f0 fyri \u00ed summar, hava vit fingi\u00f0 sendandi hesa fer\u00f0afr\u00e1s\u00f8gnina fr\u00e1 vinnaranum av h\u00f8vu\u00f0svinninginum; Ey\u00f0un Tr\u00fagvason<\/p>\n

H\u00f8vu\u00f0svinningurin var eitt vikuskifti \u00ed Mykinesi fyri fimm f\u00f3lk, vi\u00f0 \u00f8llum \u00edrokna\u00f0um, har gist bleiv \u00ed Lonin Guesthouse, Har Oda fr\u00e1 GoLocal var vertur.<\/p>\n

Flogi\u00f0 bleiv vi\u00f0 tyrluni hj\u00e1 Atlantic Airways \u00fat til Mykinesar fr\u00edggjadag og heimaftur sunnudag. \u00c1 heimfer\u00f0ini sluppu tey rundt\u00farur til allar oyggjar \u00e1 rutunetinum hj\u00e1 tyrluni, har tyrlumanningin bj\u00f3\u00f0a\u00f0i \u00e1bit og okkurt gott fyri tostan.<\/p>\n

Ey\u00f0un grei\u00f0ir solei\u00f0is fr\u00e1:<\/p>\n

Vit komu til Mykinesar vi\u00f0 tyrluni fr\u00edggjadag seinnapart. Oda fr\u00e1 GoLocal t\u00f3k v\u00e6l \u00edm\u00f3ti okkum, og bj\u00f3\u00f0a\u00f0i lekra fiskasuppu \u00ed gomlu og hugnaligu h\u00fasunum fr\u00e1 1895, har vit gistu.<\/p>\n

Hetta kv\u00f8ldi\u00f0 f\u00f3ru vit s\u00f3lseturt\u00far at hyggja eftir lundum, og vakra s\u00f3lsetri\u00f0 nutu vit afturvi\u00f0 heitum kakao og sm\u00e1kakum, me\u00f0an Oda greiddi okkum fr\u00e1 s\u00f8gnini um teir b\u00e1\u00f0ar \u00d3li rami og T\u00f3rur rami. Afturkomin \u00ed Lonina sp\u00e6ldu vit n\u00f8kur kortsp\u00f8l og l\u00f3su b\u00f3kina um flogvanlukkuna \u00e1 Kn\u00faki, sum var fyri 50 \u00e1rum s\u00ed\u00f0ani.<\/p>\n

Dagin eftir fingu vit bj\u00f3\u00f0a\u00f0 g\u00f3\u00f0an morgunmat, \u00e1\u00f0renn vit t\u00f3ku matpakkar vi\u00f0 og f\u00f3ru \u00fat \u00ed h\u00f3lmin \u00ed allar fagrasta ve\u00f0ri, har vit s\u00f3u b\u00e6\u00f0i lundar og s\u00falur heilt t\u00e6tt upp\u00e1, umframt at vit vitja\u00f0u vitan og bumbusk\u00fdli\u00f0 fr\u00e1 kr\u00edgnum.<\/p>\n

Me\u00f0an vit v\u00f3ru \u00e1 h\u00f3lminum var lambskj\u00f8t \u00ed ovninum, og oman\u00e1 fingu vit rabarbugreyt. Eisini leygarkv\u00f8ldi\u00f0 v\u00f3ru kortsp\u00f8l \u00e1 skr\u00e1nni, \u00edme\u00f0an b\u00f3kin um flogvanlukkuna bleiv send runt so \u00f8ll sluppu at lesa.<\/p>\n

Sunnudagin skuldu vit fl\u00fagva \u00e1 middegi, men tyrlan vendi vi\u00f0 \u00ed mj\u00f8rkanum, og t\u00edskil kundu vit ikki fara rundfer\u00f0 henda dagin. \u00cd sta\u00f0in f\u00f3ru vit \u00ed hugnaligu lokalu kaffist\u00f8\u00f0ina, at b\u00ed\u00f0a eftir tyrluni at sleppa avsta\u00f0, sum t\u00edbetur gj\u00f8rdi eina n\u00fdggja roynd, og t\u00f3k okkum aftur til V\u00e1gar.<\/p>\n

Av t\u00ed at rundt\u00farurin henda dagin bleiv av ongum, fingu vit bj\u00f3\u00f0a\u00f0 ein n\u00fdggjan t\u00far fr\u00e1 Atlantic Airways nakrar vikur seinni. Vit byrja\u00f0u \u00ed V\u00e1gum, og flugu s\u00ed\u00f0an til Koltur, Sk\u00favoy, st\u00f3ru D\u00edmun, T\u00f3rshavn, Klaksv\u00edk og runt um nor\u00f0oyggjar, til Kallin og Enniberg. \u00cd Klaksv\u00edk fingu vit bj\u00f3\u00f0a\u00f0 eplakaku, kaffi og sodavatn fr\u00e1 tyrlumanningini.<\/p>\n

Alt \u00ed alt h\u00f8vdu vit tvey fantastisk upplivilsir – b\u00e6\u00f0i \u00ed Mykinesi og \u00ed tyrluni. Sigast m\u00e1 at vit v\u00f3ru forkela\u00f0i uppum b\u00e6\u00f0i oyru, og hetta summari\u00f0 fara vit at minnast aftur\u00e1 sum naka\u00f0 serligt.<\/p>\n