Hósdagin 5. mai 2011 kl. 19.30, skipar Ítróttasamband Føroya fyri ráðstevnu Í Norðurlandahúsinum
Hóast hagtøl benda á, at kynsbýtið av limum í føroyskum ítrótti er javnt, eru kvinnurnar undirumboðaðar í formanssessum og nevndarsessum. Hetta er ikki ørðvísi enn í føroyska samfelagnum sum heild.
Í stjórn ÍSF, sum er ovasti myndugleiki innan føroyskan ítrótt, eru bert 10% kvinnur. Vit vita, at nógvar kvinnur gera eitt gott arbeiði fyri føroyskan ítrótt, men ítrótturin hevur eisini brúk fyri, at kvinnur síggjast aftur í nevndararbeiði.
Hví er tørvur á bæði kvinnum og monnum – blíva avgerðirnar betri av hesum? “Vit vilja fegin hava fleiri kvinnur í nevndina, men tær stilla ikki upp” – sigur formaðurin. “Eg vil gjarna verða partur av leiðsluni, men tey velja meg ikki”, sigur kvinnan.
ÍSF hevur fingið samband við tvær sera áhugaverdar kvinnur, sum arbeiða við javnstøðu, Tine Teilmann og Anette Steen Pedersen, sum fara at geva teirra boð uppá hesar og aðrar spurningar. Tine Teilmann arbeiðir við javnstøðu innan altjóða og danskan ítrótt, og Anette Steen Pedersen arbeiðir í vinnuni. Anette Steen Pedersen hevur m.a. royndir frá Danmarks Radio, Alheimsbankanum og ymiskum privatum felagsskapum. Eisini hevur hon royndir frá Danska Ítróttasambandinum.
Kostnaður: Tiltakið er ókeypis.
Endamál: Endamálið við ráðstevnuni er at virka við til, at umstøðurnar hjá bæði kvinnum og monnum, sum sita í nevndum blíva betri, at talið av kvinnum í nevndum økist og at varpa ljós á, hvussu tilfeingið hjá kvinnum kann gagnnýtast í nevndararbeiði.
Málbólkur: Øll áhugaði eru vælkomin.
Vælkomin: Petur Elias Petersen, ÍSF-forseti
Fyrilestrar:
Det er sjovt at bestemme, – også for kvinder… – Fra praktiker til idrætspolitiker.
Alle talenter skal i spil… Hvordan får vi både kvinder og mænd ind i ledelse og bestyrelser, ind der hvor beslutningerne træffes og ansvar skal tages.
Óluvá Zachariassen leiðir dagin