Úrvalsíðkari á miðnám
Sum úrvalsíðkari og næmingur á miðnámi ber nú til hjá tær at søkja um loyvda fráveru í samband við tín ítrótt. Til dømis í samband kappingar, venjingarlegur o.a
Søk her: uvs.fo/urval
Sum næmingur á miðnámi, sum fæst við úrvalsítrótt undir ÍSF fært tú:
- Hjálp til at samskipa skúlagongd og ítróttin í samráð við ÍSF vegleiðaran á skúlanum.
- Útbúgving, sum er løgd til rættis, so at til ber at vera úrvalsíðkari.
- Møguleika fyri at umskipa innlatingar.
Mannagongd fyri góðkenning
Fyri at verða góðkend/ur sum úrvalsíðkari, er neyðugt, at tú sendir eina umsókn til ÍSF, sum síðan gevur tær og skúlanum boð, um tú verður mett/ur at vera úrvalsíðkari. Skúlin metir síðani, um tú sum næmingur megnar at røkja tínar skyldur sum næmingur á ein nøktandi hátt, og um ískoytisundirvísing ella onnur stuðulstiltøk eru neyðug. Um tú fær góðkenning frá skúlanum, setir tú teg í samband við ÍSF vegleiðaran á skúlanum, og í felag leggja tit eina ætlan fyri skúlaárið í samráð við lærarar. Yvirlitið yvir ÍSF vegleiðarar er niðast á síðuni. Niðanfyri ber til at senda umsókn til ÍSF.
Hvør er úrvalsíðkari?
ÍSF ger eina heildarmeting av hvørjum einstøkum næmingi, um viðkomandi kann metast at vera úrvalsíðkari. Har verður millum annað hugt eftir hesum:
1. Er næmingurin á einum landsliði ella í einum brutto hópi?
2. Hvør er venjingarmongdin?
3. Hvørjir menningarmøguleikar eru í mun til at gerast úrvalsítróttarfólk? Meting hjá venjara verður tikin við.
4. Er venjingin á nøktandi støði í mun til at viðkomandi kann kallast úrvalsítrottarfólk, og fylgir viðkomandi eini venjingarætlan?
Treytirnar fyri góðkenning
Sum úrvalsíðkari verður væntað av tær, at tú ger tað, sum krevst fyri at fáa tína útbúgving. Tú hevur sjálv/ur ábyrgd av at røkja tína miðnámsútbúgving, ímeðan tú ert burtur frá skúlanum í ítróttarørindum. Næmingur og lærari skulu samskifta týðuliga sína millum og halda avtalur.
Tú eigur sum næmingur at vera lestrarvirkin og raðfesta útbúgvingina. Tað vil siga:
- Altíð samskifta við skúlan í góðari tíð í mun til tína fráveru
- Loysa avtalaðu uppgávurnar, ímeðan tú ert burtur
- Samskipa lesturin, tá tú er burtur, saman við ÍSF vegleiðaranum á skúlanum
- Arbeiða miðvíst uppá skúlating í áleið 2 tímar um dagin, ímeðan tú ert burtur
Skúlin skal fylgja við tíni lestrarstøðu. Um tín lestrarstøða ikki er nøktandi, kann skúlin veita ískoytisundirvísing, ella taka burtur tína støðu sum úrvalsíðkari. Sum úrvalsíðkari hevur tú møguleika fyri ískoytisundirvísing, tá tú kemur heim aftur 1 timi pr dag, tú ert burtur.
Meting um lestrarstøðuna er ein heildarmeting, sum byggir á vanligu skilhaldsreglurnar, at avtalur í mun til útbúgvingina verða hildnar og at tað ber til at fáa gerandisdagin við skúlatingum og ítrotti at hanga saman.
Søk her: uvs.fo/urval
