Sambært Evstulóg fyri ÍSF § 29, stk. 3, hevur starvsnevnd ÍSF samtykt hesa

REGLUGERÐ fyri fíggjarnevndina

§ 1

Fíggjarnevndin er mannað við trimum limum, sum verða valdir av starvsnevndini:

  • Forseti ÍSF, sum er formaður
  • Ein starvsnevndarlimur
  • Ein eksternur fíggjarkønur, sum samstundis eisini er skrivari í fíggjarnevndini

Limirnir í fíggjarnevndini eru valdir, inntil starvsnevndin velur aðrar nevndarlimir.

§ 2

Starvið hjá fíggjarnevndini fevnir m.a. um at gera uppskot um býtislykil fyri fíggjarstuðul til sersambondini og gera uppskot um fíggjarætlan fyri ÍSF.

§ 3

Fyri at kunna útinna sítt starv sambært § 2 hevur fíggjarnevndin fund við hvørt sersamband í minsta lagi einaferð um árið. Á hesum fundi luttekur fíggjarnevndin og nevndin fyri hvørt sersamband. Í góðari tíð undan nevnda fundi, sum nærri ásett av fíggjarnevndini, sendir sersambandið til fíggjarnevndina fullfíggjað roknskapartilfar fyri farna álmanakkaár, herundir fylgjandi tilfar fyri viðkomandi sersamband:

  • Almenna ársroknskapin
  • Grannskoðanarprotokoll
  • Ársroknskapin uppsettan eftir felags kontoplaninum
  • Fíggjarætlan fyri komandi 3 árini
  • Framtíðarætlanir av týdningi

Sersambandið hevur skyldu at útvega meira og annað tilfar, útgreina tilfarið ella svara spurningum og ivamálum frá fíggjarnevndini, um fíggjarnevndin metir tørv vera á tí.

Fíggjarlig skjøl og upplýsingar, sum sersambondini lata fíggjarnevndini, eru í trúnaði og eru bert tøk fyri fíggjarnevndini og umsitingini hjá ÍSF. Vísandi til grein 32 í Evstulóg fyri ÍSF verða almennu roknskapirnir hjá sersambondunum tó lagdir út á heimasíðuna hjá ÍSF.

§ 4

Uppskot til býti av fíggjarstuðli til sersambond verður lagt fyri starvsnevndina til góðkenningar, síðani umboðstingið til kunningar/umrøðu og til seinast lagt fyri aðalfund ÍSF til góðkenningar.

§ 5

Henda reglugerð kann bert broytast við samtykt av starvsnevndini.

Samtykt á starvsnevndarfundi 18. mai 2020.

Reglugerð fyri fíggjarnevnd sum pdf